• 102
• ২৯শে সেপ্টেম্বর ২০২৬ ইং
• Share on:

সাহিত্য একাদেমি এৱার্দি মোইরাংথেম রাজেনগী ৱারীমচা লাইরিক ''মীরক্তসু যুধিষ্ঠির অমা'' ফোঙখ্রে

ইম্ফাল, সেপ্তেম্বর ২৭ঃ সাহিত্য একাদেমি এৱার্দি মোইরাংথেম রাজেননা ইবা ৱারীমচাগী লাইরিক ''মীরক্তসু যুধিষ্ঠির অমা'' ঙসি নুংথিল পূং ২ তাবা মতমদা হৌনবী মতুংইন্না জি পি ৱুমেন্স কোলেজ, ইম্ফালগী সেন্ট্রেল হোলদা ফোঙখ্রে।

থৌরম অদুগা মরী লৈননা অথোইবা মীথুংলেনগী ৱারোল পীরদুনা বিরেন্দ্রজিৎ নাউরেমনা মণিপুরদা লৈরিবা হীরম কয়াদা ইদুনা লাইরিক ফোঙলিবা অইবশিংগী কমপ্লেক্স অমা লৈঙাক্লা থম্বীবা মথৌ তারে হায়না ফোঙদোক্লদুনা মণিপুর লৈঙাক্না হীরম অসিদা পূক্নিং চঙবীদুনা থবক ওইনা ওন্থোকপীনবা তকশিনখি।

লাইরিক ফোঙবগী থৌরমগা মরী লৈননা ফিক্সন এন্দ পোইত্রি ক্লবকী সেক্রেতরি কৈথেল্লাকপম লন্দননা থৌরমগী নুংগী ৱারোল পীরদুনা, ফিক্সন এন্দ পোইত্রি ক্লবনা লমদম অসিগী অনৌবা মীরোলগী অইবশিংদা হেন্না পূক্নিং থৌগৎপগা লোয়ননা মখোয়না মণিপুর খোরিরোলগী তুংগী লাইবক লেপকনি হায়না থাজৈ। অনৌবা মীরোল হায়রগা চহী নৌবদু নত্তে, অনৌবা খোঙচৎ অদুবুনি। খোরিরোল হায়বসি মতমগী মতুংইন্না অহোংবা নাইবগা লোয়ননা অপাবশিংদা অনৌবা মহাও পীবদুনি। ঙসি ফোঙলিবা মোইরাংথেম রাজেন চহীদা য়েংলুরবদি নৌদ্রে, থবক্তগী পোত্থারবনি। সাহিত্য একাদেমি এৱাৰ্দসু ফংলবনি। অদুবু মহাক্কী খোরিরোলগী খোঙচৎতি অনৌবা মায়কৈদা অনৌবা চাংয়েংগা লোয়ননা অনৌবা পোত্থোক থিবনি। মসিনসু ক্লব অসিগা হেন্না নকশিন্নবগী মরম অমা ওইহল্লি। মতুংদসু হেন্না পুথোকপা ঙম্বা ওইসনু হায়খি।

ফিক্সন এন্দ পোইত্রি ক্লব, মণিপুর, উরিপোক, ইম্ফালনা শীন্দুনা পাঙথোকপা থৌরম অসিদা সাহিত্য এদাদেমি এৱার্দি বিরেন্দ্রজিৎ নাউরেম, ফিক্সন এন্দ পোইত্রি ক্লব, মণিপুরগী প্রসিদেন্ত থৌদাম নেত্রজিৎ সিংহ অমসুং মণিপুর য়ুনিবর্সিতিগী মণিপুরী দিপার্তমেন্তকী প্রোফেসার চিরোম রাজকেতন সিংহনা মথং শিৎনা অথোইবা লেঙবীরকপা, থৌরম মপু অমদি অখন্নবা লেঙবীরকপশিং ওইনা শরুক য়াখি।

পনবা য়াবদি, মহাক্কী ''চেপথরবা ঈশিং পুন'' হায়না মিংথোনবা ৱারীমচাগী লাইরিক অসিদা সাহিত্য একাদেমি এৱাৰ্দ-২০১৬ ফংবা মোইরাংথেম রাজেনগী ঙসি ফোঙলিবা অসিনা তরেৎশুবা লাইরিক্নি। মমাঙদসু ৱারীমচাগী লাইরিক মরি, শৈরেং গী লাইরিক অমা অমসুং নোবেল অমা খুদোল তমখ্রবনি।

সোর্স - পোক্নফম