• 14
• ৩১শে মে ২০২৬ ইং
• Share on:

১৭ শুবা মণিপুর ম্ভেত ফিল্ম এৱার্দ- ২০২৫ লান্থোকখ্রে 

সিনেমাগী মতেঙনা ঐখোয় ইশাবু অমদি সোসাইতিবু ময়েক শেংনা উহনবা ঙম্মীঃ গবর্নর

ইম্ফাল, মে ২৯ঃ সিনেমা হায়রিবা আর্ত ফোর্ম অসিগী মতেঙনা ঐখোয় ইশাখক নৎতনা সোসাইতি অসিবুসু ময়েক শেংনা উহনবা ঙম্মী হায়না মণিপুরগী গবর্নর অজয় কুমার ভল্লানা ফোঙদোকখ্রে।
গবর্নরনা ৱাফম অসি মণিপুর স্তেত ফিল্ম দিবলপমেন্ত সোসাইতি (এম এস এফ দি এস) না শীন্দুনা ১৭ শুবা মণিপুর ম্ভেত ফিল্ম এৱার্দ, ২০২৫ লান্থোকপগী থৌরমদা গবর্নরনা ফোঙদোকখিবনি।

                                 গবর্নর অজয় কুমার ভল্লা

ঙসি পেলেস গেত্তা লৈবা এম এস এফ দি এসকী ওদিতোরিয়ামদা পাঙথোকখিবা থৌরম অদুদা চীফ গেস্ত ওইনা শরুক য়াখিবা মণিপুরগী গবর্নর অজয় কুমার ভল্লানা হায়, মহাক্না অসিগুম্বা থৌরম অসিদা শরুক য়াবা ফংবা অসি লাইবক ফবনি। থৌরম অসি ক্রিএতিব স্পিরিত, আর্তিস্তিক এক্সলেন্স অমদি মণিপুরী সিনেমাগী চথরিবা খোঙচৎপু পুক্নীং থৌগৎপনি। সিনেমা হায়বসি সোসাইতিগী মিংশেল ওইবখক নৎতনা কলেক্তিব মেমোরিবুসু য়োকখৎলিবনি।
সিনেমানা হৌজিক ওইরিবশিংবু মীয়ামদা জ্ঞান তাহনবা ঙম্মী অমদি ফ্যুচরদা ওইরকপা য়াবশিংসু উৎপা ঙম্মী। মণিপুর অসি ময়ামগা মান্নদবা কলচরেল ভোইস অমা পুদুনা চৎপা স্তুেত অমনি। মসি মণিপুরগী প্রজাগী হিস্ত্রি, ত্রেদিসন, ভেল্যু অমদি এক্সপরিএন্সশিংনা শেমগৎপনি। ফিল্ম খুদীংমক কলচরেল মেমোরিবু য়োকখৎপগা লোয়ননা মতম-মতমগী অশেংবা মশকসু উৎলি।
ঙসি লান্থোক্লিবা এৱার্দ অসি ঐখোয়গী ফিল্ম মেকর, রাইতর, স্কোলর অমদি ক্রিএতিব প্রোফেসনেলশিংগী আশা, অমদি কমিতমেন্তপু  থোগৎপনি। এৱার্দ অসিনা ফিল্মখক্তং নত্তনা রাইতিং অমদি পরিকেসন্না সিনেমা অসি আর্ত ফোর্ম অমা ওইনা জ্ঞান তাহনবদসু অচৌবা মতেঙ ওইরি। মখোয়না মণিপুরী সিনেমাগী ইন্টলেকচুএল অমদি হিস্ত্রিগী লম্ব শেমগৎপদসু কন্ত্রিবিউসন চাউনা পীরি। সিনেমাগী মতেঙনা ঐখোয় ইশাবু অমদি সোসাইতিবু ময়েক শেংনা উহনবা ঙম্মী হায়নসু গবর্নরনা মখা তানা ফোঙদোকখি।

                      লাইফ তাইম এচিবমেন্ত এৱার্দ দাঃ লোকেন্দ্র অরাম্বমদা লান্থোকখিবগী মতাং অমা

থৌরমদুদা প্রসিদেন্ত ওইনা শরুক য়াখিবা মণিপুরগী চীফ মিনিস্তর ৱাই খেমচান্দনা হায়খি, মণিপুরী সিনেমা অসি করম্না হৌরকখি অমদি হৌজিক্লা করি স্তেজদা লৈরি হায়বসি অখঙ-অহৈশিংনা হেন্না খঙবিরবনি। মণিপুরী সিনেমাগীদি অৱাৎপগী অৱাৎপা ঙাক্তনি। অদুবু লমদমসিগী ফিল্ম পুথোকপীরিবশিং, দিরেক্তরশিং, আর্তিস্তশিং অমদি ফিল্ম স্কৃপ্ত রাইতরশিংনা মণিপুরগী কলচর অসি ঙাক্না চৎতুনা হোৎনরিবা অসিদি অদুক্কী মতীক থাগৎলি। হন্দক্তা মণিপুরী ফিল্ম 'বুং' না বাফ্‌তা এৱার্দসকী চিলড্রেন এন্দ ফেমিলী কেতেগোরীদা বেস্ত ফিল্ম এৱার্দ ফংবা ঙমদুনা লমদমসিগী নৎতনা লৈবাক অসিগী মিংচৎ পুরকপা ঙমখি। মসিগীদমক স্তেত অসিনা চাওথোকবা ফাওই হায়খি।

                              চীফ মিনিস্তর ৱাই খেমচান্দ

ঙসিগী থৌরম অদুদা গেস্ত ওব ওনর ওইনা শরুক য়াখিবা আর্ত এন্দ কলচরগী মিনিস্তর লোকেন্না, স্তেত অসিদা লৈরিবা ফিল্মগা মরী লৈনবা খুদীংমক্পুসু অপূনবগী ৱাখল্লোন অমদা পুশিনবা ঙম্নবা ঐখোয় পূন্না অমুক্তং হোৎনমিন্নসি। থোইদোক্লা আর্তিস্তশিংনা অমত্তা ওইবগী ওইবগী ৱাখল্লোন্দা সোসাইতি অসিদা লৈরিবা মীপূম খুদীংমকপু লোয়নরগা চৎলবদি অমুক্কা হেন্না আর্ত অসি হেন্না মাঙলোমদা পুখৎপা ঙমগনি হায়না খল্লি ৱাফম কয়া ফোঙদোক্তুনা আর্তিস্তশিংবু শীংথাবা ফোঙদোকখি।
ঙসিগী থৌরম অদুদা ইং ২০২৫ গী এম এস এফ দি এস লাইফ তাইম এচিবমেন্ত এৱার্দ দাঃলোকেন্দ্র অরাম্বমদা লান্থোকখিবগা লোয়ননা মনোরঞ্জন লোংজম্না দিরেক্সন তৌবা অমসুং অশেম নৱাং অমদি অমরজিৎ সনসম পুথোকপা মণিপুরী ফিচর ফিল্ম 'লাংগোই' দা চহীসিগী বেস্ত ফিচর এৱার্দ লান্থোকখি।
নন-ফিচর ফিল্ম কেতেগোরিদা 'দ সাইলেন্ত পরফোর্মর' ফিল্মগী প্রদ্যুসর এন লক্সমী অমদি দিরেক্তর হুইদ্রোম রাকেসতা স্পিসিএল জুরি মেন্সন, 'দ লিগেসি ওব ফোর জেনেরেসন্স' কী প্রদ্যুসর মাইবম ব্রোজেস্বরীদা অমদি দিরেক্তর থিয়াম দেবেন্দ্রদা স্পিসিএল জুরি এৱার্দ লান্থোকখি।
ফিচর ফিল্ম কেতেগোরিদা 'উনা উনা' ফিল্মগী সোমা লাইশ্রমদা স্পিসিএল জুরি মেন্সন (লিদ এক্তর ফিমেল) এৱাৰ্দ, 'ৱান নেস' ফিল্মগী
দিরেক্তর প্রিয়াকান্ত লাইশ্রমদা স্পিসিএল জুরি এৱার্দ, 'সুনিতা' ফিল্মগী দাবো ৱাংখৈময়ুমদা বেস্ত মেক-অপ, 'উনা উনা' ফিল্মগী গলিফ পাদা বেস্ত কস্ত্যুম দিজাইনর, 'লংদাই অমা' ফিল্মগী কুইন্তন ময়েংবমদা বেস্ত কোরিওগ্রাফর, ফিল্ম অসিমক্কী মহেন্দ্র সি ঐচতা বেস্ত ভি এফ এক্স সুপরভাইজর এৱার্দ, 'সুনিতা' ফিল্মগী এভিলেখ বরুৱাদা বেস্ত ওদিওগ্রাফর (লোকেসন/সিঙ্ক সাউন্দ) অমসুং ফিল্ম অসিমক্কী নবাপান দেকাদা বেস্ত সাউন্দ দিজাইনর, 'উনা উনা' ফিল্মগী অশোক কুমার মোইরাংথেম অমসুং লম্বাময়ূম প্রেমচান্দদা বেস্ত লিরিসিস্ত, 'ওইথরৈ' ফিল্মগী রাজু মুতুমদা বেস্ত ম্যুজিক দিরেত্তর (বেক গ্রাওন্দ স্কোর), 'উনা উনা' ফিল্মগী তোনি অহৈবমদা বেস্ত ম্যুজিক দিরেত্তর (সোংস), ফিল্ম অসিগী শৈশকপী পুষ্পারানি হুইদ্রোমদা বেস্ত প্লেবেক সিঙ্গর (ফিমেল), ফিল্ম অসিগী শৈশকপা আর্বিন সোইবমদা বেস্ত প্লেবেক সিঙ্গর (মেল) গী মনা লান্থোকখি।
'মংঙালসনা' ফিল্মগী প্রিয়োব্রত ক্ষেত্রিময়ূমদা বেস্ত স্কৃনপ্লে রাইতর (এদাপ্তেদ), 'ওইথরৈ' ফিল্মগী লম্বাময়ূম প্রেমচান্দদা বেস্ত স্কৃনপ্লে রাইতর (ওরিজিনেল), 'সুনিতা' ফিল্মগী পুইনাবতি থোংঙামদা বেস্ত আর্ত দিজাইনর, 'লাংগোই' ফিল্মগী তরুন ৱাংদা বেস্ত এদিতর, 'উনা উনা' ফিল্মগী রিগান কে ঐচতা বেস্ত সিনেমাতোগ্রাফর, 'নাইতোম শাৎপী' ফিল্মগী অলকা থোংঙামদা বেস্ত চাইল্ড আর্তিস্ত, 'ৱান নেস' ফিল্মগী ময়া চৌধুরিদা বেস্ত এক্তর ইন সপোর্তিং রোল (ফিমেল), 'লাংগোই' ফিল্মগী জি বোনি শর্ম্মাদা বেস্ত এক্তর ইন সপোর্তিং রোল (মেল), 'সুনিতা' ফিল্মগী নর্মাদা সৌগাইজমদা বেস্ত এক্তর ইন লিদিং রোল (ফিমেল), 'ওইথরৈ' ফিল্মগী সুরজ ঙাশেপ্পমদা বেস্ত এক্তর ইন লিদিং রোল (মেল), ফিল্ম অসিগী দিনেস নাওরেমদা বেস্ত দেব্যু ফিল্ম দিরেক্তর, 'লাংগোই' ফিল্মগী মনোরঞ্জন লোংজমদা বেস্ত দিরেক্তর অমসুং মোইরাংথেম রোমেস সিংহনা পুথোকপা অমসুং ইরেল লুৱাংনা দিরেক্সন তৌবা  'উনা উনা' হায়রিবা ফিল্ম অসিনা বেস্ত পোপুলর ফিল্ম প্রোভাইদিং হোলসম এন্তরতেনমেন্তকী মনা লান্থােকখি।

সোর্স - পোক্নফম