ধর্মনগরদা রাজর্ষি ভাগ্যচন্দ্রগী ২৮৬ শুবা মপোক কুমওন
আগরতলা, জুন ২০: অৱাং ত্রিপুরা জিলাগী ধর্মনগরদা ইনিংথৌ রাজর্ষি ভাগ্যচন্দ্রগী ২৮৬ শুবা মপোক নুমিৎ পাঙথোক্কদৌরি। বার্থ এনিভর্সারী কমিটি অব রাজর্ষি ভাগ্যচন্দ্র, ধর্মনগরনা মণিপুরগী রাজর্ষি ভাগ্যচন্দ্র কালচরেল ফাউন্ডেশনগী মতেং লৌরগা জুন তাং ২১ ধর্মনগর মনতলাদা খিন্না লৈবা ভাগ্যচন্দ্রগী মীতমদা হৈকৎ লৈকৎ তমগনি। রাজর্ষি ভাগ্যচন্দ্রগী মপোক কুমওনগা মরী লৈননা রাজবাড়ী মান্ডপতা পাঙথোক্কদবা থৌরম অমা ফাউন্ডেশনগী প্রেসিডেন্ট রাজকুমার জীতেন্দ্রজিৎনা থৌরম মপু ওইরগা গেষ্ট ওইনা নেশনেল এৱার্ডি আরকে ইন্দিরা দেবী, সোসেল এক্টিভিষ্ট কে রবীন্দ্র সিংহ, এম.য়ু কলচরগী পোত্থারবা ওজা মাখনমনি মোংশাবা, এমএসপিটিগী এডভাইজর ডব্লিউ বীরমঙ্গল, লময়ানবগী ফাউন্ডার কেএসএইচ মাধবী, গোবিন্দজিউ বোর্ড মেম্বর আসেম নাওবা নচিংবা শরুক য়াগনি হায়রি।
থৌরমদা বাংলাদেশ অমসুং মণিপুরগী অখন্নবা মীওই ৬ দা মেমেন্টো, সার্টিফিকেট অমসুং নীংশিং খুদোল লান্থোকপগা লোয়ননা অৱাং ত্রিপুরা জিলাগী শক্লাইরবা মীওই কয়াদা এচিভমেন্ট এৱার্ড পীদুনা ইকাইখুম্নগনি হায়রি। মপোক কুমওন থৌরমগা মরী লৈননা সেমিনারসু পাঙথোক্কদৌরি। সেমিনার অদুদা বাংলাদেশ, ত্রিপুরা, আসাম অমসুং মণিপুরগী স্কোলার শিংনা পেপার পাথোক্কনি হায়রি।
অরোইবা নুমিৎতা নিপা পালা অমসুং গৌরলীলা শান্নগনি। লীলা শান্নগদবা অদুদি দি ওল মণিপুর গৌড়াঙ্গ লীলা ষনশেম্বা আর্টিষ্ট এসোসিয়েশন, থাংমৈবন্দ মণিপুরননি হায়না বার্থ সেলেব্রেশন কমিটিগী চেয়ারম্যান ককচিংতাবম কুমার শর্মা, ইম্ফাল অমসুং সেলেব্রেশন কমিটি, নর্থ ত্রিপুরা গী সেক্রেটারী অহৈবম রবীন্দ্র কুমারনা থাদোরকপা চেরোলদা হায়রি।
সোর্স : মরূপ
0 কমেন্ট:
কমেন্ট তৌবিয়ু